Tac-evac 2000 — masofadan boshqariladigan gusenitsali tibbiy evakuatsiya va transport roboti
Ixcham gusenitsali evakuatsiya va transport platformasi — og‘ir sharoitlarda yarador harbiy xizmatchilarni xavfsiz hududga tezkor evakuatsiya qilish hamda zarur tibbiy vositalar va yuklarni tashishga mo‘ljallangan masofadan boshqariladigan yoki yarim avtonom maxsus texnika. Platformada yarador uchun zambil tizimi, tibbiy jihozlar bo‘limi, akkumulyator bloki, ventilyatsiya tizimi, aloqa vositalari va yuk joylari ko‘zda tutilgan. Kompakt o‘lchamlari va gusenitsali yurish qismi uni notekis hamda murakkab relyeflarda qo‘llash imkonini beradi.
Autosearch
Autosearch — bir-biridan uzoq masofada joylashgan radiorelealoqa stansiyalarining antenna qurilmalari bir-birlarining joylashgan joyini inson omilisiz aniqlash va korrespondent tomonga yo‘naltirish. Harbiy bo‘linmalar notanish hududlarga chiqib joylashganda aloqachi mutaxassislar tomonidan hududni o‘rganish, gorizont tomonlarini aniqlab so‘ngra antennani kerakli tarafga yo‘naltirish uchun ko‘p vaqt yo‘qotilishini inobatga olib, kelgusida ekipaj aralashuvisiz antenna o‘zining joylashgan koordinatalarini aniqlaydi, ikkinchi stansiya bilan koordinatalar ma’lumotlarini radioblok orqali almashish natijasida bir-birlariga nisbatan joylashuvini taqqoslab kerakli burchakka buradi va aloqa o‘rnatish vaqtini sezilarli darajada kamaytiradi.
“Ko‘zgu” FPV head tracking tizimi
Harbiy zirxli texnikalar, xususan, BTR va tank haydovchilari uchun zamonaviy elektron ko‘rish tizimini ishlab chiqishga qaratilgan innovatsion texnik loyiha bo‘lib, asosiy vazifasi haydovchining tashqi muhitni kuzatish imkoniyatlarini kengaytirish, ko‘rish tirqishlarining cheklanganligini kamaytirish va boshqaruv jarayonida qulay elektron ko‘rish muhitini yaratishdan iborat.
Mobil pelengator
Mobil Pelengator — real vaqt rejimida ultra qisqa to‘lqin diapazonida radionurlanish manbalarining joylashgan joyini aniqlash uchun mo‘ljallangan. Mazkur vositalarning bir nechtasini lokal tarmoq yoki internet orqali birlashtirish orqali nurlanish manbasi joylashgan joyni aniqlash mumkin. Loyiha kuzatuv ostidagi davlatlarning chegaraoldi hududlarida joylashgan bo‘linmalarining radioaloqa vositalari nurlanish yo‘nalishlari va joylashgan joylarini aniqlashga qaratilgan.
Operativ radiochastota razvedkasi va FPV dronlar signalini lokalizatsiya qilishning izolyatsiyalangan apparat-dasturiy tizimi
Operativ radiochastota razvedkasi va FPV dronlar signalini lokalizatsiya qilishning izolyatsiyalangan apparat-dasturiy tizimi.
Pechora-2M majmuasi simulyatsion trenajori
Pechora-2M — zenit raketa kompleksining boshqaruv mashinasi hisobini jangovar ish bo‘yicha har xil sharoitlarda vazifani bajarish imkonini beruvchi kompyuterli simulyatsion dastur-trenajyor. Loyiha orqali havo nishonlari hujumini, havo nishonlarining yakson qilish zonasiga kirishini va ularning zenit boshqaruv raketasi bilan uchrashish nuqtasini hisoblash, raketaning havo nishoni tomon parvozi va uni urib tushirganligini imitatsiya qilish, otishni baholash, HHM ZRQ mutaxassislarini jangovar hisob tarkibida tayyorlash uchun real holatga yaqin vaziyat yaratish hamda jangovar hisobni cheklanmagan marta shug‘ullantirish amalga oshiriladi.
Zamonaviy HPM qurol tizimlarini UGV platformalarga moslashtirish
UGV (yerustdagi robotlashtirilgan platforma) orqali harakatlanuvchi ixcham HPM (yuqori quvvatli mikroto‘lqinli) dronlarga qarshi mudofaa tizimi — harbiy-texnik nuqtai nazardan juda dolzarb, zamonaviy va chuqur muhandislik yondashuvini talab qiladigan qurilma.
Phantom Vision
FPV (First Person View) dron uchuvchilarining analog video ko‘zoynaklari (VRX) hamda dron versiyasidagi videouzatkich (VTX) o‘rtasidagi radioaloqaga ma’lum masofada kuchli xalaqit va bosim beruvchi Radio-Elektron Bosim (REB) qurilmasi.
Ziyrak AI
“Ziyrak AI” — FPV dron orqali olingan tasvirni real vaqtda qayta ishlash, obyektlarni aniqlash, ularni toifalarga ajratish va natijalarini tushunarli tarzda foydalanuvchiga taqdim etishga qaratilgan loyiha. Tizim kompyuter ko‘rishi usullari yordamida rasmdagi texnikani belgilash, uning taxminiy toifasi hamda aniqlashning ishonchlilik ko‘rsatkichini aks ettirishni nazarda tutadi.
Avianos-83
Avianos — kelajakda uchuvchisiz uchish apparatlarini suv havzalaridan boshqarish uchun mo‘ljallangan bo‘lib, suzish uzoqligi 60 metrni tashkil qiladi va 1 kilogramm yuk bilan harakatlana oladi.
Mobil skaner
Qurolli Kuchlarning barcha kuch tuzilmalaridagi toifalangan va toifalanmagan hududlarga kirish qat’iy nazorat qilinadi. Shuning uchun nazorat o‘tkazish punktlaridagi xavfsizlik tizimini yanada kuchaytirish va sutkalik naryad xizmatini samarali tashkil etish muhim vazifa hisoblanadi. Hozirgi kunda nazorat o‘tkazish punktlarida mavjud metalldetektorlar hududga kirayotgan fuqarolarni faqat yakka holda tekshirish imkonini beradi, bu esa vaqtning ko‘p sarflanishiga olib keladi.
Tartibbuzarlarni qo‘lga olish uchun xizmat itiga o‘rnatiladigan elektroshoker
Tartibbuzarlarni qo‘lga olish, ularni zararsizlantirish maqsadida xizmat itlari shlemiga maxsus elektroshoker o‘rnatiladi. Bu moslama ommaviy tartibbuzarliklar yoki qochishga uringan jinoyatchilarni qo‘lga olishda foydalaniladi. Kinolog tomonidan pult bilan boshqariladi.
Temir qalqon
Temir qalqon — portlovchi qurilmalarni masofadan turib tekshirish va zararsizlantirish uchun mo‘ljallangan uchuvchisiz yer usti roboti (UGV). Robot operator tomonidan masofadan boshqariladi hamda kamera, manipulyator va maxsus sensorlar yordamida xavfli hududlarda xavfsiz ishlash imkonini beradi. Loyiha sapyorlar xavfsizligini oshirish, operatsiyalar samaradorligini ta’minlash va inson hayotiga bo‘lgan xavfni kamaytirishga qaratilgan.
Optik tolali avtonom dron
RER va REK (radioelektron razvedka va kurash) ta’siriga mutlaq chidamli kamikadze FPV droni. Aloqaning tabiiy yoki sun’iy sabablarga ko‘ra uzilishi holatlari uchun dronga maxsus avtonom rejim qo‘shilgan. Bu esa har qanday murakkab muhitda berilgan jangovar vazifaning yuqori aniqlikda bajarilishini ta’minlaydi.
SwarmIntercept
SwarmIntercept — dushman dronlari to‘dasiga va FPV-dronlarga qarshi kurashish uchun mo‘ljallangan, bir-biri bilan to‘g‘ridan-to‘g‘ri muloqot qiluvchi va taqsimlangan jammer (radioelektron bosim) qo‘llovchi avtonom mini-dronlar tizimi. U xavf paydo bo‘lganda avtomatik havoga ko‘tariladi va dushman obyektlariga maksimal yaqin masofada yo‘naltirilgan nuqtali xalaqit beradi.
Universal dekoder
Universal dekoder — UQT diapazonida nurlanayotgan yopiq raqamli signallarni texnik tahlil va radiomonitoring qilish, dekodlash hamda dekodlash natijasida olingan ovoz ma’lumotlarini yozib olish uchun mo‘ljallangan maxsus apparat-dasturiy vosita. Mazkur vosita bir vaqtning o‘zida 8 tagacha qabul qilgichni boshqarish imkoniyatini berib, ulardan qabul qilinayotgan raqamli signallar haqida to‘liq ma’lumotlarni taqdim etadi.
ZSU-23-2 simulyatori
Ushbu loyiha ZSU-23-2 zenit qurilmasini boshqarish ko‘nikmalarini xavfsiz muhitda o‘rgatishga mo‘ljallangan zamonaviy apparat-dasturiy VR simulyatoridir. Loyiha 3D muhitda kechikishsiz aloqa orqali amaliy mashg‘ulotlarni haqiqiy jangovar sharoitga maksimal darajada yaqinlashtiradi.
Wire-Leech
Yuqori kuchlanishli elektr simlariga qo‘nib, ularning magnit maydonidan induksion usulda tekin quvvat oluvchi va dronlarning parvoz vaqtini cheksiz uzaytiruvchi avtonom monitoring tizimi.
UUA-TQT
UUA-TQT — uchuvchisiz uchish apparatlarini to‘r orqali qurshab tutib olish uchun mo‘ljallangan qurilma. Yaqin masofada insonga xavf solayotgan, uchib kelayotgan dronlarni ushlab qolishga xizmat qiladi; aniq mo‘ljalga olish uchun kamera bilan jihozlangan.
Dron sapyor
Dron Sapyor — xavfli minalashtirilgan hududlardagi minalarni havodan kelib xavfsizlantiradi hamda uni zararsizlantirib, ehtiyotkorlik bilan ko‘taradi va xavfsiz hududga olib boradi.
Xalaskor-26
Ushbu loyiha 6 g‘ildirakli platforma ustiga o‘rnatiladigan turli vositalar yordamida ko‘p funksiyalarni bajarish uchun mo‘ljallangan masofadan boshqariluvchi robot. Uning yordamida ekstremal sharoitlarda yaradorlarni olib chiqish, jang maydonini minalashtirish, o‘t o‘chirish, razvedka-kuzatuv harakatlarini olib borish, qurollar o‘rnatish hisobiga masofadan turib dushmanga zarba berish kabi vazifalar bajariladi.
“Obi zirak”
Suv ostiga tushadigan, kabel orqali operator boshqaradigan robot. Robotga kamera, yoritgich, sonar va chuqurlik sensori o‘rnatiladi. Operator qayiqda yoki qirg‘oqda turib, ekrandagi tasvir orqali robotni boshqaradi.
Raqa — QR-kod asosidagi raqamli qurol saqlash va hisobga olish tizimi
“QR Code” orqali elektron hisobga olish, identifikatsiya qilish va saqlanish holatini nazorat qilishga mo‘ljallangan avtomatlashtirilgan tizim. Tizim ma’lumotlarni yagona elektron bazada saqlash va tezkor hisobot shakllantirish imkonini beradi.
Face orqali otish tayyorgarligi monitoringi
O‘q otish mashg‘ulotlarini raqamlashtirish, qatnashuvchilarning bilim va amaliy tayyorgarligini avtomatik baholash hamda o‘q otish jarayonini xavfsiz va samarali boshqarish. Tizim qatnashuvchilarni ro‘yxatga oladi va kamera nazoratida test o‘tkazadi, test natijalarini avtomatik hisoblab yetarli ball olganlarga o‘q otishga ruxsat beradi, sensorlar orqali yiqilgan mishenlar sonini aniqlab natijalarni avtomatik baholaydi.
Oshxona platformasi
Loyihaning asosiy maqsadi — oshxona faoliyatini qog‘ozbozlikdan xalos etish, oziq-ovqat mahsulotlari sarfini aniq hisob-kitob qilish, menyu (taomnoma) tuzishni avtomatlashtirish va rahbariyatga oshxonada ovqatlanganlar soni, shaxsiy tarkibning to‘liq ma’lumoti va kirish vaqtigacha aniq statistik ma’lumotlarni yetkazib berishdan iborat.
Face terminal
O‘zbekistonning milliy biometrik nazorat tizimi Smart Face Terminal — OrangePi mikrokompyuteri bazasida yaratilgan, sensorli ekran, yuqori aniqlikdagi kamera va sun’iy intellektga asoslangan milliy biometrik ruxsat berish (Access Control) qurilmasi.
Teplovizorli binokulyar
Loyiha teplovizorli binokulyar qurilmasini ishlab chiqishga qaratilgan bo‘lib, u kecha va kunduz sharoitida uzoq masofadagi obyektlarni kuzatish, harorat farqlarini aniqlash hamda murakkab ob-havo sharoitlarida ishonchli tasvir olish imkonini beradi. Qurilma 640×512 termal modul, germaniy obyektiv, ikki ko‘zli Micro-OLED okulyar, Zybo Z7-20 FPGA+ARM protsessor platasi va akkumulyator tizimidan tashkil topadi.
Harbiy xizmatchilarning jismoniy tayyorgarligini sun’iy intellekt yordamida tekshirish qurilmasi
Mazkur qurilma harbiy xizmatchilarning jismoniy tayyorgarlik sinovlarini zamonaviy texnologiyalar yordamida avtomatik nazorat qilish va baholash uchun mo‘ljallangan. 1 km va 3 km yugurishda harbiy xizmatchiga GPS modul va yurak urish tezligini o‘lchovchi sensor taqiladi. Tizim yugurish masofasi, vaqti, tezligi va yurak urish tezligini real vaqt rejimida kuzatib, natijalarni avtomatik qayd etadi.
“Tog‘ yo‘lbarsi”
“Tog‘ yo‘lbarsi” — tor tog‘ so‘qmoqlarida yuk tashuvchi yordamchi robot. Bu robot suv, oziq-ovqat, asbob va tibbiy jihozlarni tashib, odam ko‘taradigan yukni kamaytiradi.
Kichik hajmli dron (FPV)ga qarshi to‘r otuvchi qurol
Loyiha kichik hajmli FPV dronlardan kelib chiqadigan xavfni kamaytirish maqsadida to‘r yordamida dronni shikastlamasdan tutib qolishga mo‘ljallangan qurilmaning ilmiy-texnik prototipini ishlab chiqishni nazarda tutadi. Qurilma elektron boshqaruv, holatni nazorat qilish, xavfsiz ishga tushirish blokirovkasi va sinov natijalarini qayd etish tizimlari bilan jihozlanadi.
